Impaulog ti ‘Commission on Elections’ Committee on Kontra Bigay ti show-cause order idi Sabado kontra kenni sigud a chairman a ni Sheriff Abas gapu iti maatap a vote-buying.
Indaulwan ni Abas ti Comelec manipud 2017 agingga 2022.
Nagkandidato daytoy iti 1st District ti Cotabato City iti umuna a parliamentary elections ti Bangsamoro Autonomous Region in Muslim Mindanao.
Maibasar iti kopya ti show-cause order a pinirmaan ni COMELEC-Kontra Bigay vice chairperson Teopisto Elnas Jr., naibasar daytoy iti social media post seknan iti maatap a vote-buying.
Iti nasao a social media post, maatap nga adda ti advance vote-buying iti District 2, karaman metlaeng iti naipablaak ti maipagarup a sample ballot a nakaikabilan ti nagan ni Abas ken tallo a pedaso ti P1,000 bills.
Patien ti Kontra Bigay Committee a buklen daytoy ti posible a panaglabsing iti Section 261 ti Batas Pambansa Bilang 881, Omnibus Election Code.
Kabayatanna, nainget met a pinaglibakan ni Abas ti nasao nga alegasyon.
