BAGUIO CITY – Nainget a tubtubngaren ti ama ti Bakun, Benguet ti signature campaign ti kompanya a Hydroelectric Development Corporation (HEDCOR) a mangkidkiddaw iti suporta kadagiti umili iti munisipyo.
Sigun kenni Mayor Bill Raymundo, nakadanun iti opisinana a sagsaggaysaen ti kompanya dagiti umili sadiay tapno alaenda ti suportada iti kompanya.
Impettengna a saan a naipakada ti nasao a signature campaign iti opisinana tapnu maipaka-ammo ken maipaka-awat kuma a naimbag daytoy kadagiti umili.
Inyunay-unayna a saanda a kontra iti HEDCOR gaputa adu metten ti naitulong ti kompanya kadagiti umili sadiay.
Sigun kenkuana, nasken laeng a magna ti nasao a kampanya iti umno a proseso sakbay a maisayangkat kadagiti umili.
Dinakamat pay ni Mayor Raymundo a maamak daytoy iti nasao nga addang gaputa posible nga aramaten to ti HEDCOR dagiti pirma iti signature campaign kontra kadakuada nangruna ita a saan paylaeng a narisut ti isyu iti nagbaetan ti lokal a gobyerno ken ti nasao a kompanya.
Gapu iti daytoy, balbalakadanna dagiti umili sadiay Bakuna a basaen ken awatenda a nalaing dagiti maipapapirma kadakuada sakbayda nga agpirma gaputa saanda pay nga ammo ti mapaspasamak iti nagbaetan ti lokal a gobyerno ken ti nasao a kompanya.