Intudo ti Malacañang ni sigud a Congressman Mike Defensor a daytoy ti maysa kadagiti maatap nga adda iti likudan ti destabilization plot kontra kenni President Ferdinand Marcos Jr.
Sigun kenni Press Officer Undersecretary Claire Castro, nabatad ti modus operandi dagiti Duterte supporters seknan iti panagtangdan kadagiti indibidual a mangamid kadagiti estoria kontra iti Presidente, kasukat ti dakkel a gatad ti kuarta.
Daytoy ti kinuna ni Atty. Castro kalpasan nga imbabawi ti sumagmamano kadagiti “Maleta Boys” ti testimoniyada kontra kada President Marcos Jr. , sigud a House Speaker Martin Romualdez, ken dadduma pay a mammanday-linteg.
Innayon ni Castro nga adu ti makarikrikna a paset daytoy ti destabilization plot ni Defensor ken dagiti kakaduana.
Inlawlawag ni Castro nga agsasao daytoy iti biang ni President Marcos Jr. ken indagadagna iti publiko a saan a matnag kadagiti kastoy nga aramid agsipudta adda dagiti inosente madad-dadael.
