Nagpiansa iti ₱1,320,000.00 ti maysa a sigud a kandidato iti kina-mayor iti siudad iti Baguio para iti temporario a pannakawaya-wayana kalpasan a natiliw idi Pebrero 16, 2026.
Ti kuarentay-dos anyos nga akusado, a nalatak metlaeng kas maysa a lokal a negosiante, ket timmaray iti kangatuan a posision iti siudad idi Mayo 2025 local elections, ngem saan a nagballigi ti panagtarayna.
Maibasar iti report ti pulisia, naibilin ti pannakatiliaw idi Enero 27, 2026 tapno sangwen ti sangapulo ket maysa a bilang iti Falsification of Private Documents by a Private Individual.
Ti warrant of arrest ket inruar iti Presiding Judge iti Family Court, Third Judicial Region idiay Clark Field, Pampanga.
Maibasar iti rekord iti Baguio Justice Hall, binayadan iti akusado ti kasapulan a piansa iti mismo nga aldaw iti pannakatiliwna.
Saan a daytoy ti umuna a gundaway a nairaman ti sigud a kandidato iti legal a pakaistoryaan.
Idi Mayo 2025, sumagmamano a kanito kalpasan ti eleksion, tiniliw metlaeng isuna iti Baguio City Police Office iti bileg ti warrant of arrest para iti kasona nga estafa, nga ada pakainaiganna iti pribado a transaksion iti pangnegosio.
Ti nasao nga insidente ket nakawaat iti pammabalaw manipod iti publiko gaputa naaramid daytoy a dagos kalpasan laeng iti panagbobotos.
Iti agdama, agtultuloy latta ti panagdenggeg iti immuna a kasona manipod idi napalabas a tawen.
