BAGUIO CITY – Pimmusay ti sigud a kandidato ti kina-mayor iti La Paz, Abra kalpasan a pinalpaltogan ti saan pay a nabigbig a suspek iti maysa a pagtagilakuan sadiay Poblacion, La Paz, Abra idi kalman.
Nabigbig daytoy a ni Severo Afos III alyas Toncio, 70-anyos, naasawaan ken residente iti nasao a lugar.
Iti imbestigasyon dagiti pulis, gumatgatang ti biktima idi killaat daytoy a pinalpaltogan ti suspek.
Nagsagrap ti biktima iti tama ti bala ti paltog iti rupa, tengnged, ima ken barukongna a nagresulta iti dagus nga ipupusay daytoy.
Naglibas met ti suspek babaen iti maysa a motorsiklo.
Narekober dagiti pulis iti nakapasamakan ti insidente ti uppat a basyo ti bala manipod iti caliber 45.
Iti agdama, manarimaan ti imbestigasyon ti pulisya iti kangrunaan a motibo ken pakabigbigan ti suspek iti insidente.
Naamuan a nagkandidato ni Afos iti kina-mayor ti La Paz idi 2016 ken 2019 ngem naabak daytoy.
