BAGUIO CITY – Im-imbestigaran ita dagiti otoridad ti pammaltog a nagresulta iti ipupusay ti maysa a sigud a kapitan sadiay Abra idi rabii.
Nabigbig daytoy a ni Leo Barbosa alyas ‘Jumong’, sigud a kapitan ti Barangay Guimba sadiay San Juan, Abra ken agdama a provincial coordinator ni Senator Ronald ‘Bato’ Dela Rosa para iti probinsia ti Abra.
Naamuan nga adda ita sadiay Abra ni Barbosa tapnu agiwaras kadagiti alcohols, face masks ken thermal scanners a donasyon ni Sen. Dela Rosa para kadagiti babbarangay, sumagmamano nga istasyon ti pulisya ken kadagiti agkasapulan iti laban kontra iti COVID-19.
Maibasar iti inisyal a report ti San Juan Municipal Police Station, nakatakder ti biktima iti sangwanan ti balayda idi pinaltogan daytoy ti saan pay a nabigbig a suspek.
Naitaray daytoy iti Abra Provincial Hospital ngem naideklara a dead on arrival.
Ni Barbosa ti maikadua a sigud a kapitan sadiay Abra a napapatay ita a bulan.
Maipalagip nga idi napalabas a lawas ket kinawtibo ken pinalpaltogan dagiti armado a lallaki ni sigud a Bañacao, Bangued Punong Barangay Robert ‘Bobby’ Millare.
Matmaturog ni Millare ken dagiti kakadwana iti kiosko iti likudan ti balayda idi kinawtibo daytoy dagiti armado a lallaki ken pinalpaltoganda agingga a pimmusay iti igid ti Abra River.
