BAGUIO CITY – Nakemmeg ti sigud a miyembro ti rebelde nga NPA kalpasan a naiserbi ti warrant of arrest kontra kenkuana sadiay Poblacion, Bontoc, Mt. Province itay laeng nabiit.
Nabigbig daytoy a ni Jacinto Roy Chocaocao Faroden alyas Digbay, 52-anyos, tubo ti Sacasacan, Sadanga, Mt. Province ken residente ti North Sanitary Camp, Baguio City.
Naiserbi ti warrant of arrest kontra kenkuana gapu iti kasona a frustrated Murder ken Robbery.
Narekomendaran daytoy ti piyansa a dumanon iti P200,000 para iti kasona a frustrated Murder ken P100,000 iti kasona a roberry.
Ni Chocaocao ket sigud a miembro ti NPA iti sidong ti KLG AMPIS, naidesignar kas 1st Deputy Secretary ti Ilocos Cordillera Regional Committee (ICRC) ken CO ti Platoon William ti KLG AMPIS.
Naamuna a maysa pay daytoy kadagiti suspek a nangpabettak iti Tailing Dam 5 ti Lepanto Consolidated Mining Company, Carbon ti Pulp Processing Plant, ken heavy equipment (backhoe) idi July 7, 2017 sadiay Cabatuan, Colalo, Mankayan, Benguet.
Naiturong daytoyen iti Bontoc MPS, Mt. Province PPO para iti dokumentasyon sakbay a maipama iti korte.
