Impakaamo ti kampo ni sigud a Negros Oriental Representative Arnolfo “Arnie” Teves Jr. a nawayawayaanen daytoy manipod iti preventive detention iti Becora Prison idiay Dili, Timor Leste ita nga aldaw.
Sigun iti legal counsel ni Teves Jr. a ni Atty. Ferdinand Topacio, daytoy ket gaputa ti kiddaw nga “extradition” ti gobierno ti Pilipinas ket “out of time” ken saan a maitunos iti “practice” ken “international law”.
Iti sabali a pannao, saan a nagballigi ti gobierno nu sadinno, naideklara nga iligal ti pannakaibalud ni Teves Jr.
Inlawlawag ni Topcaio kas maibasar iti statement ni CRA Law Office ken Dr. Jose Ximenez, adda pay dagiti “judicial proceedings” a rumbeng a tungpalen ni Teves Jr. ken kasapulan a maipasidong daytoy mainaig iti panagtalinaedna idiay Timor Leste mangrugi inton bigat.
Manamnama a makipaset daytoy kaduana ti saksi iti bukodna kenni sigud a Human Rights Commissioner Wilhelm Soriano nga agpresinta kas eksperto iti “human rights”.
Kabayatanna, immunan a pinaglibakan ti kampo ni Teves Jr. ti damag a maisubli iti Pilipinas daytoy manipod Timor Leste.
Maipalagip a nakemmeg ni Teves idiay Dili bayat nga agay-ayam daytoy ti golf kas maibasar iti International Criminal Police Organization (Interpol) red notice a naipaay kontra kenkuana.
Ti red notice ket maysa a request para iti law enforcement iti sangalubungan a mang-locate wenno mangkemmeg iti maysa nga indibidual bayat a maur-uray ti pannakai-extradition, pannakaisuko, wenno umasping a legal a panagtignayna.
