Nagyaman ni sigud a PNP Chief General Nicolas Torre III kadagiti taga-suporta daytoy ken kinunana a nariknana ti panagayat ken panagtalekda kenkuana iti baet ti killaat a pannakaikkatna kas dadaulo ti Philippine National Police.
Impeksana a ti sasao ken kararag dagiti taga-suportana ti agserserbi kas pigsana ken inspirasyonna.
Nagyaman metlaeng ni Torre kadagiti naasi kenkuana ngem kiniddawna a saan a rumbeng a makarikna iti asi kenkuana gapu ta uray killaat ti pannakaikkatna iti posisyon ket nasayaat latta daytoy iti agdama.
Impettengna a nu adda man ti rumbeng a makariknaan iti asi ket dagiti minilmilyon a Pilipino a kanayon a mabikbiktima iti panaglayos.
Kinuna ni Torre a dagitoy ti agkaskasapulan iti napudno a panangipateg ken panangisakit gapu ta saan a rumbeng nga agdusa ken agrigat ita a panawen ti panagtutudo.
Inyunay-unay pay ti nasao nga opisyal nga awan ti sakit ti nakemna iti presidente gapu ta maawatan a kasapulanna nga agaramid iti nadagsen a desisyon kas iti panang-ikkatna kenkuana kas dadaulo ti Philippine National Police.
Inkarina met nga agtaltalinaed latta daytoy a pulis ken nakasagana nga agserbi iti pagilian a Pilipinas.
