Mangnamnama ni sigud a presidential spokesperson Harry Roque a mairaman daytoy kas maysa kadagiti counsel ni sigud a President Rodrigo Duterte kadagiti hearing wenno proceedings nga ipatungpal ti International Criminal Court (ICC) kontra iti kaso a crimes of humanity.
Iti panagsango ni Roque iti media ken kadagiti sumagmamano a Pilipino nga adda ita nga aldaw iti mismo a ruar ti ICC idiay The Hague, Netherlands, kinunana a nangisumiter dagitoy iti kaskenan a dokumento iti mahistrado tapno mairaman daytoy kas maysa kadagiti counsel ni sigud a President Duterte.
Dinakamat ni Roque nga iti agdama ket ni laeng sigud nga Executive Secretary Salvador Medialdea ti narecognize nga agserbi kas counsel ni Duterte kadagiti proceedings nga ipatungpal ti ICC.
Sigun kenni Roque, ti panagsango ni sigud a President Duterte iti ICC inton alas nuebe ti rabii, oras ti Pilipinas ket maibaga ken maipakaawat laeng kenkuana ti kaso a sangsangoenna ken dagiti karbenganna.
Maipalagip a ni Roque ket sumangsango iti nagduduma a kaso iti pagilian gapu iti panaglabsingna kadagiti probisyon ti Code of Conduct and Ethical Standards for Public Officials gapu kadagiti saan nga agpapada ken agtutunos a dokumento nga impasana iti kongreso maipapan iti sanikua ken kinabaknangna.
