Nagparang ni sigud a press secretary Trixie Cruz-Angeles idi kalman iti National Bureau of Investigation (NBI) kas sungbat iti subpoena seknan iti sasao nga inaramid ni Vice President Sara Duterte nga adda ti binilinna nga indibidual a mangpapatay kenni President Ferdinand “Bongbong” Marcos Jr. nu matay daytoy.
Manarimaan ti imbestigasion ti National Bureau of Investigation (NBI) iti mapapati a “grave threats” mainaig iti Cybercrime Prevention Act of 2012 ken posible a panaglabsing iti Anti-Terrorism Act of 2020, kasaruno ti mapapati a “kill order” kontra iti Presidente, First Lady Liza Araneta-Marcos, ken House Speaker Martin Romualdez.
Naikeddeng nga agparang inton Nobiembre 29 iti sanguanan ti nasao nga ahensia ni Angeles, ngem naiyakar iti Disiembre 11 gapu iti kiddaw ti kampona.
Maipalagip a ni Cruz-Angeles ket nadutukan kas dadaulo iti Presidential Communications and Operations Office iti sidong ti administrasion ni Marcos.
Nagikkat iti puestona idi Oktubre 2022 gapu iti rason ti salun-at.
Kabayatanna, kinuna ni NBI chief Jaime Santiago nga iti kanito a saan a makipaset ni Vice President Sara Duterte iti naituding a petsa, isubmitir ti nasao nga ahensia ti ebidensia seknan iti sasaona kadagiti prosecutors ti Department of Justice (DOJ).
Immuna nga inlawlawag ni Vice President Duterte a ti sasaona kontra kenni President Marcos Jr., First Lady ken ni Congressman Romualdez ket “maliciously taken out of logical context.”
