Natalgeden ti kasasaad ni Kerwin Espinosa kalpasan a pinalpaltugan ti saan pay a nabigbig a gunman bayat ti panagkampaniana ken dagiti kakaduana idiay Barangay Tinag-an, Albuera, Leyte idi malem kalman.
Iti campaign page ni Espinosa, naipakaammo a nasayaaten ti kasasaadna ken kiniddawda kadagiti mangsupsuporta kenkuana nga agtalinaed a natibker kasaruno ti napasamak a pammaltog.
Maibasar iti police report, ni Espinosa ket nakatugaw ken agur-uray iti gundawayna nga agsao idi killaat a pinalpaltogan ti saan pay a nabigbig a lalaki a nakalemmeng iti “ceiling” ti entablado.
Karaman kadagiti nadangran ket ti kandidato ti kina-bise mayor a ni Mariel Espinosa Marinay ken ti maysa a menor de edad.
Dagos met a naiturong dagitoy iti pag-agasan, ken dagos metlaeng a nangipatungpal dagiti maseknan nga otoridad iti hot pursuit operation, bayat a naimuntar ti roadblocks iti nakapasamakan ti insidente.
Kabayatanna, kinondenar ti Commission on Elections ti insidente.
Maipalagip a ni Kerwin Espinosa ket sigud a self-confessed drug lord ken inaklonna ti akemna iti illegal drug trade bayat ti naglabas nga administrasion.
Simmango daytoy kadagiti nagduduma a reklamo mainaig iti iligal nga droga, ngem adu kadagitoy ket na-dismiss.
Anak daytoy ti napapatay a mayor ti Albuera a ni Rolando Espinosa Sr., ken agpada dagitoy nga inakusaran ni sigud a President Rodrigo Duterte a karaman iti panaglako ti iligal a droga iti pagilian.
