Nasentensyaan ti sigud a Prime Minister iti South Korea a ni Han Duck-soo iti 23 a tawen a panakaibalud kalpasan a napaneknekan iti Seoul Central District Court Criminal Division 33 a naaddaan daytoy iti akem iti insurrection iti nasao a pagilian partikular ti panakaideklara iti martial law idi December 2024.
Iti baet a short-lived wenno saan unay a nagbayag ti indeklara ni sigud a President Yoon Suk Yeol a martial law sakbayna nga imbabawi, impetteng ti nasao a korte a kas maysa a prime minister nga indirect a nakaawat iti democratic legitimacy and responsibility, rumbeng koma nga inaramid ni Han ti pagrebbenganna a mangsalaknib iti Konstitusyon ken paglintegan.
Kinuna ti korte a binaybay-an ti sigud a prime minister ti responsibiliad daytoy nu sadino, imbes a lapdanna ti insurrection ket rumrumwar a sinuportaranna pay daytoy, iti namnama nga agballigi.
Innayon ti korte nga imbes koma a sangwen ti akusado ti sungsungbatanna a kaso, rimwar nga inlemmengna pay dagiti dokumento mainaig iti panakaideklara ti martial law tapno isalakan ti bagina, nagpartuat ken nangdadael kadagiti opisyal a dokumento ken nakaaramid iti perjury kabayatan ti panagdengngeg.
Iti baet a nagkiddaw ni Han iti dispensar wenno pammakawan iti final statement daytoy, kinuna ti korte a ti sinseridad ti nasao nga apology ket narigat a maawat.//Rob
