Nagsublin ti sigud a President ti South Korea a ni Yoon Suk Yeol kaduana ti asawana ken ti sangapaulo ket maysa nga aso ken pusada iti apartmentda idiay Seoul, South Korea idi laeng kalman, nga asideg iti opisina dagiti piskal a nanggedan ti napapanaw a lider sakbay a simrek iti politika.
Nangrugin ti baro a biag da Yoon ken ti asawana a ni Kim Keon Hee, a pagaammo gapu iti pagaayatna kadagiti taraken, kalpasan a na-impeach gapu iti napaay a panangideklarana iti martial law.
Iti sidong ni Yoon, nangipasa ti South Korea iti gakat a mangiparit iti pannangan ken panaglako iti karne ti aso iti pagilianda.
Kabayatanna, dumanon iti agingga lima pulo a presidential security service personnel ti maibaon a mangbantay iti agassawa, a maikari iti proteksion iti lima a tawen, sigun iti maysa a report iti nasao a pagilian.
