Naarestar ti maysa a lalaki alyas ‘Jon”, agtawen iti 38, awanan asawa ken trabaho ken nailista kas maysa a High Value Individual (HVI) base iti PNP Database babaen iti buy-bust operation idiay Barangay Bakakeng Norte/Sur, Baguio City ita nga aldaw.
Nakumpiska manipud kenkuana ti agarup 60 grams ti maatap a shabu nga adaan ti SDP a PhP408,000.00.
Ti suspek ket agdama a residente ti Avelino Fairview, Baguio City ngem tubo daytoy ti Gordon Heights, Olongapo City.
Ti pannakatiliw ti nasao a suspek ket balligi babaen iti operatiba ti Philippine National Police Drug Enforcement Group Special Operations Unit ti Cordillera Administrative Region.
Kabayatanna, dua a heat-sealed transparent plastic sachet a naglaon iti maatap a shabu nga addaan iti pakabuklan a timbang nga agarup sangapulo a gramo nga addaan iti Standard Drug Price a P68,000.00 ti inlako ti suspek.
Bayat iti panangkapkap dagiti operatiba iti suspek, naalada ti sabali pay a maatap a shabu manipud iti bulsa daytoy a nakakabil iti knot tied transparent plastic sachet sakbay a naikabil iti basit a brown envelope.
Ti nasao a maatap a shabu a naala manipud iti bulsa ti suspek ket agdagsen iti agarup 50 a gramo ti maatap a shabu ken addaan Standard Drug Price a P340,000.00.
Malaksid iti dayta, nakumpiska metlaeng ti sumagmamano a non-drug evidences kas iti kwarta (buy-bust money ken boodle money), maysa a selpon, ken ti brown envelope a naikabilan ti maatap a shabu.
Balligi ti nasao nga operasyon babaen ti operatiba ti PNP Drug Enforcement Group Special Operations Unit ti Cordillera Administrative Region, lead unit; Baguio City Police Office Station 10; City Drug Enforcement Unit (CDEU) Baguio City; PDEA CAR Baguio-Benguet Provincial Office; Regional Drug Enforcement Unit (RPDEU) Police Regional Office CAR; Regional Intelligence Unit 14 ken PDEA Land Transportation Interdiction Unit (RSET Bravo). Naiturn over metten ti suspek iti Baguio City Police Office Station 10 para iti temporaryo a kustodiya bayat a naiturnover met dagiti nakumpiska a drug evidences iti Regional Forensic Unit (RFU)-CAR idiay Camp Major Bado Dangwa, La Trinidad, Benguet para iti Qualitative Examination.
Dagiti met non drug evidences ket addan iti kustodiya ti PNP DEG SOUCAR para ti umno a dokumentasyon ken disposition.
Kabayatanna, iti initial nga impormasyon a nakalap ti Bombo Newsteam, sigud a tulak ti droga ti suspek sadiay Olongapo City ngem gapu ta pimmudut daytoy sadiay ket nagnaed daytoy iti syudad ti Baguio. Daytoy met ti kaunaan a gundaway a makemmeg daytoy iti siudad. // via Bombo Noveh Organo
