BAGUIO CITY – Napaay ni sigud a two-time ONE lightweigt champion Eduard Folayang a maipangabak ti maikatlo a panagsangoda kenni Japanese jiu-jitsu expert Shinya Aoki iti ONE on TNT IV a naangay idi agsapa sadiay Singapore.
Naabak ti 36-anyos a Team Lakay fighter babaen iti submission, partikular ti arm bar kalpasan a pinasardeng ti referee ti laban kalpasan ti uppat a minutos ken duapulo a segundo ti umuna a rikos gapu iti panag-tap out ti Igorot MMA fighter.
Nabaelan ni Folayang a maliklikan dagiti immuna a gandat ni Aoki a mang-take down kenkuana ngem nabaelan latta ti Japanese MMA veteran a ma-take down ni Folayang.
Apaman nga adda dagitoy iti ground, timmama kenni Folayang dagiti danog ni Aoki agingga a nakontrolna ti takiag ni Folayang a nagresulta iti panag-tap out daytoy.
Daytoyen ti maikatlo a nagsaruno a panaka-abak ti Pinoy MMA icon nga addaan ti rekord a 22-wins, 11-losses bayat a napapintas ni Aoki ti rekordna iti 47-win, 9-losses.
Immuna a nagsango iti octagon da Folayang ken Aoki idi 2016 a nangabakan ni Folayang babaen iti technical knockout ken idi 2019 a nangabakan met ni Aoki babaen iti arm-triangle choke.
