BAGUIO CITY–Pimmusayen ti sigud a gobernador ti Benguet a ni Atty. Raul “Rocky” Molintas.
Maibasar iti impormasyon a naala ti Bombo Radyo Baguio iti maysa nga anak daytoy a ni Baron Ralph Molintas, pimmusay ti sigud nga opisyal sadiay California Pacific Medical Center – Pacific Campus idi kalman, Pebrero 14.
Naamuan a pimmusay daytoy gapu iti stroke iti alas siete iti rabii sadiay Estados Unidos wenno iti alas otso itay agsapa iti oras ti Pilipinas.
Maipalagip a ni Atty. Molintas ket nagserbi kas gobernador ti Benguet idi July 1995 agingga June 2004 kalpasan ti panagserbina kas Board Member ti probinsia iti 1988 agingga 1992.
Impangruna ti panakaipaay ti dekalidad a serbisyo para iti salun-at dagiti umili iti probinsia ken iti sidong ti lideratona ket naipasidong iti rehabilitasyon ti Benguet General Hospital.
Nagbalin pay nga aktibo daytoy iti ay-ayam a chess ken golf.
Addaan daytoy iti dua nga anak iti asawana a ni Purificacion Suanding-Molintas nga agserserbi ita kas tourism attaché ti Philippine Consulate sadiay San Francisco.
Sigun kenni Baron, awan pay ti pinal nga aldaw a napagnunumuan ti pamilya nu kaanu a maiyawid iti pagillian ti bagi ti sigud a gobernador.
