BAGUIO CITY–Naitabon ita a malem ni sigud a Benguet Governor Raul “Rocky” Molintas sadiay Wangal, La Trinidad, Benguet.
Sigun ken ni Benguet Indigenous People Mandatory Representative (IPMR) Sario Copas, napatgan ti kiddaw ni Benguet Governor Crescencio Pacalso a pannakaiturong pay ti bangkay ti sigud a gobernador iti Provincial Capitol ti Benguet sakbay a maitabon daytoy ita a malem.
Immuna iti daytoy, indaulan ni Benguet Governor Pacalso ti necrological services iti daytoy sadiay kapitolyo.
Itay laeng ket nalpas ti public viewing iti bangkay ti sigud a gobernador sakbay daytoy a maitabon.
Maipalagip a pimmusay ni Molintas iti tawenna a 60 sadiay San Francisco, California gapu iti sakit daytoy a leukemia ken hemorrhagic stroke.
Kabayatanna,Ibilbilang met ni IPMR Sario Copas ni sigud a a Benguet Governor Raul “Rocky” Molintas kas dakkel a pukaw iti probinsia ti Benguet a maysa kadagiti maibilbilang a world class leader.
Sigun ken ni Copas, kabayatan ti panagserbi ni Molintas iti probinsia ti Benguet ket adu dagiti naaramidan daytoy.
Kinunana a karaman iti daytoy ti pannakapadur-as ti sector ti turismo ti probinsia nga isu ti maysa kadagiti kangrunaan a tinutukan ti sigud nga opisial.
Gapu iti daytoy, kinuna ni Copas a maiparbeng laeng nga agtalinaed ti sigud a gobernador iti panunot dagiti umili.
