BAGUIO CITY – Malamlamayan ita ti sigud a bise-mayor ti Aguinaldo, Ifugao kalpasan a pimmusay gapu iti aksidente a panakatnag daytoy manipud iti maysa a bus sadiay Potia, Alfonso Lista, Ifugao idi kanikadua.
Nabigbig daytoy a ni Mario Nalliw Henaggon, 69-anyos, naasawaan, retired a Municipal Local Government Operations Officer, sigud a bise mayor ti Aguinaldo ken residente ti Galonogon, Aguinaldo, Ifugao.
Maibasar iti report, naglugan ti biktima iti ayan ti bubong ti bus nga addaan plaka a BVG 870 ken imanmaneho ni Brent Sacyong, 45-anyos ken residente ti Talite, Aguinaldo, Ifugao.
Nagtaud ti bus manipud Santiago City ken paturong sadiay Aguinaldo, Ifugao.
Kabayatan ti panagdalyasat ti bus iti kalsada, saan a nakita ti biktima ti linya ti kuryente manipud iti poste ti kuryente paturong iti maysa a balay ken sadiay a naisab-it ti tengnged ti biktima a nangitunda met daytoy maiguyod ken matnag daytoy iti kalsada.
Naitaray ti biktima iti pagagasan ngem naideklara daytoy a dead on arrival.
