BAGUIO CITY – Agingga ita ket sebsebseban paylaeng ti La Trinidad Fire Station ti ag-uppat nga aldaw a puor iti sigud a dumpsite wenno basuraan sadiay Windy Hill, Poblacion, La Trinidad, Benguet.
Sigun kenni FSI Fransisco Copes, dadaulo ti LT Fire Station, dumanonen iti nasurok 2000 sqm a paset ti basuraan ti maur-uram manipud pay idi Lunes.
Kinunana nga uppat nga aldawen a sebsebsebanda ti nasao nga uram ngem marigatan dagitoy gapu kadagiti naglalaok a basura.
Gapu iti daytoy ket agsapsapolda pay iti kasamayan a wagas tapnu masebseban ti uram kadwada ti La Trinidad Municipal Environment and Natural Resources Office.
Ita nga agsapa ket agsublida manen iti fire site tapnu ikagumaanda a dalusan ti lugar tapnu saan a mairaman a mauram ti dadduma a paset ti bantay.
Dinakamatna pay nga agbalbalin a perwisyo kadagiti residente ti napuskol ken naangot nga asok manipod kadagiti maur-uram a residual ken plastic wastes.
Nakaawat met ti reklamo ti Bombo Radyo Baguio manipud iti maseknan a residente sadiay seknan iti nasao nga uram ken inawaganda payen nga Smoky Mountain ti Windy Hill.
