BAGUIO CITY – Nakedngan a guilty ni sigud a Baay-Licuan, Abra Mayor Aunnielyne Castillo iti tallo a bilang ti malversation of public funds iti sidong ti Revised Penal Code.
Nailanad iti desisyon ti Seventh Division ti Sandiganbayan a maibalud ni Castillo iti innem agingga sangapulo ket maysa a tawen iti maysa a bilang ti panaglabsingna ken maibalud pay iti dua agingga innem a tawen iti tunggal maysa kadagiti dua pay a panaglabsingna.
Dumanon met iti P2.15 million ti bayadanna a multa.
Maibasar iti court records, naawat ni Castillo ti pakabuklan a P2.15 million a cash advances manipud idi April 2001 agingga June 2001 ken iti naisayangkat nga special audit idi 2002 ket naduktalan ti Commission on Audit a mapukpukaw dagiti disbursement vouchers a mangsuportar kuma kadagiti cheke a naipaluspos kenni Castillo.
Iti baet met ti dua a demand letters a naipatulod kenni Castillo idi 2001 para iti panaka-liquidate ti multi-million peso funds ket nagtalinaed nga unliquidated dagiti nasao a cash advances.
Kabayatanna, imbasura ti korte ti kaso kontra iti co-accused a ni Jewelyn Narciso, ti OIC Municipal Treasurer idi panawen ni Castillo kalpasan a naawat ti korte ti Certificate of Death daytoy.
Immunan pay a naipaulog idi October 2013 ti Hold Departure Order kontra kada Castillo ken Narciso.
