BAGUIO CITY – Pimmusayen ti sigud a mayor ti siudad ti Baguio a ni Braulio Yaranon iti tawenna a 90 gapu iti sakit a pneumonia.
Iti panakiuman ti Bombo Radyo kenni Jonathan Llanes, panakangiwat ti pamilya Yaranon, kinunana nga 12:40 ti pangaldaw idi kalman a pimmusay ti sigud a mayor ti Baguio.
Kiniddaw met ti pamilya Yaranon kadagiti makaam-ammo iti mayor nga iti agdama ket dagiti pamilya paylaeng ti makadwa dagitoy.
Nagyaman met ni Llanes kadagiti nagbalin a supporters ti mayor ken dagiti timmulong kenni Yaranon idi nagbalin daytoy nga opisyal.
Maipalagip a sakbay a nagbalin a mayor ni Yaranon ket nagbalin pay daytoy a sekretarya ti siudad idi 1955-1959, councilor idi 1960-1963, bise mayor idi 1987 sakbay a nagbalin a City Judge idi 1980-1997 ken executive judge iti regional trial court sadiay San Fernando, La Union.
Kalpasan met a nagretiro daytoy iti panagbalinna a judge ket nagbalin manen daytoy a councilor ti siudad ken nagbalin a mayor idi 2004.
