BAGUIO CITY – Pimmusayen ti nagserbi a mayor ti siudad ti Baguio idi napasamak ti 1990 killer earthquake.
Iti panakiuman ti Bombo Radyo kenni Vice Mayor Edison Bilog, kinunana nga alas-11 idi rabii idi pimmusay ti sigud a mayor a ni Jaime Roldan Bugnosen iti tawenna a 91.
Segun iti bise-mayor, mangipasada iti resolusyon iti sangguniang panlungsod tapnu idanon iti pamilya ti sigud nga opisyal ti panakipagriknada iti ipupusay ti sigud nga opisyal.
Kinunana a makiumanda met laeng iti staff ti lokal a konseho para iti maysa nga aldaw a panakaimasayag ti bangkay ti sigud a mayor iti city council gaputa nagbalin met laeng daytoy a bise mayor ti siudad.
Iti agdama ket mabambantayan ti bangkay ni Bugnosen iti balayda sadiay Sta. Escolastica, Baguio City.
Maipalagip nga idi October 1989 agingga June 1992 ket nagserbi daytoy a mayor ti Baguio ken daytoy ti nangidaulo iti panagbangon ti City of Pines manipud iti makadadael a gingined iti pakasaritaan ti siudad.
