BAGUIO CITY – Ginuyugoy ti maysa a sigud a New People’s Army trainee dagiti miyembro ti rebelde a grupo a bumabada iti bantay ken agsublidan iti gobyerno.
Iti panakiuman ti Bombo Radyo kenkuana, kinuna ni alyas “Sofia” a napimpintas nu ibbetan dagiti rebelde ti armas dagitoy ken bumaba dagitoy gaputa napintas ti agbiag iti nawaya.
Immunan nga insalaysayna ti kapadasanna nu apay a pinanggepna ti kumappeng iti rebelde a grupo.
Kinuna ni ‘Sofia’ a nagtrabaho daytoy iti balasiw-taaw ngem apaman a naamoanna nga inbisyo ti asawana dagiti impawpaw-itna a kwarta ken nagbabai daytoy ket nagawid.
Simrek daytoy iti kolehiyo kas self-supporting student ngem bayat ti panagad-adalna ket pinagim-imonan ti asawana dagiti propesorna a lallaki.
Dinakamatna a gapu iti nakaro nga imon ti asawana ket sisasango a tinadtadna ti uniporme ni Sofia iti kamada ken impangtana a tadtadenna daytoy sakbayna nga isakuro wenno ikurkor kadagiti tarakenna a manok, malaksid pay a killawenna ti bagis daytoy.
Uray rabii ket pimmanaw daytoy iti balayda ken nagawid daytoy sadiay Kalinga.
Naamoan dagiti kakabagianna ti napasamak ket ginandatda nga agibales ngem saan a natuloy kalpasan a binagbagaan daytoy ti kabsatna a pastor.
Imbinglayna a kabayatan ti nasao a nakudrep a paset ti biagna ket inasitganna ti barkadana iti high school ken imbinglayna ti parikotna iti daytoy.
Dita a ginuyugoy daytoy ti barkadana a kumappeng iti NPA a dagusna met a pinatgan gaputa tarigagayna nga agibales iti asawana ken iti babai ti asawana.
Kinunana a tallo a lawas daytoy a nagsanay iti kabambantayan, napadasna ti nagkarkaradap a saan pulos a nagtaktakder ken pinadasna ti mangan iti bassit a makan.
Kalpasan ti panagsanayna ket nagawid daytoy iti balayda ken nangala iti backpack ngem nangegna ti sangit ti inaudi nga anakna ket dita a nalawagan ti nakullaapan a panunot daytoy.
Nagsubli latta daytoy iti bantay ngem nagpakada kadagiti kameng ti NPA a saannan nga ituloy ti panggepna a kumappeng kadagitoy.
Ni ‘Sofia’ ket maysa kadagiti nakipaset iti Light at the End of the Tunnel ti Kahapon Lamang Program ti Bombo Radyo Baguio.
