BAGUIO CITY-Plano ti pamilia daydi PCInsp. Gednat Tabdi ti mangipila iti sabali a kaso kontra kadagiti maitudtudo nga akin basol iti nakaam-ames a pannakapapatay ti 44 a kameng ti Special Action Force (SAF) idi Enero 25, 2015.
Sigun ken ni Garcia Tabdi, panggepda nga iraman nga ipilaan iti kaso ni sigud a Presidente Benigno Aquino III gapu pay laeng iti panangpalubos daytoy iti operasion a naisayangkat sadiay Mamasapano para iti pannakakemmeng ni Malaysian terrorist Zulkifli Abdhir alias “Marwan”.
Dinakamatna a nangipiladan iti administrative case kontra kada sigud a PNP Chief Alan Purisima, Police Director Getulio Napenas ken iti tallo nga opisial ti Armed Forces of the Philippines.
Kinunana a daytoy ket gapu pay laeng iti maatap a panangbaybay-a dagiti nasao nga opisial kadagiti SAF trooper a naipasango kadagiti rebelde.
Mainaig iti daytoy ket imbasura ti Benguet Regional Trial Court Branch 62 ti naipila a mosion para iti pannaka-dismiss ti kaso a naipila kada Purisima, Napenas ken dadduma pay nga indibidual a mapabpabasol iti nasao a pammapatay.
