BAGUIO CITY – Nagbalin a karit iti Public Information Officer ti Philippine Drug Enforcement Agency (PDEA) – Cordillera ti panag-review daytoy para iti 2016 Bar exam kagiddan ti nainget a kampanya ti Philippine National Police ken PDEA kontra iti iligal a droga.
Sigun kenni Atty. Joseph Frederick Calulut, nagbalin pay a karit kenkuana ti panagbalinna a working student nangruna ti panangibalanse-na iti oras iti panagadal ken iti panagtrabahona.
Kinunana nga impilpilitna nga insingit ti panagbasa iti ‘busy schedule’ dagitoy iti ahensia ken nagbalin pay a parikut ti financial aspect nangruna iti panaggatang kadagiti libro nga inar-aramatna.
Imbingayna met a ti ‘codals’ laeng ti inaramatna a nag-review para iti 2016 Bar exam.
Nagleppas ti 39-anyos a ni Atty. Calulut iti College of Law ti University of Baguio idi 2012 kalpasan ti walo a tawen a panagadalna ti law ken dagus a nag-eksam ngem saan a pimmasa.
Nagyaman met daytoy iti suporta kenkuana ti sigud a regional director ti PDEA-Cordillera a ni Atty. Juvenal Azurin nangrunata naipaayan iti konsiderasyon idi manarimaan ti panag-review daytoy.
Iti agdama ket saanna a maibaga no agtalinaed pay daytoy iti PDEA-Cordillera wenno ag-practice kas abogado.