BAGUIO CITY – Ipadas paylaeng ti lokal a gobyerno ti Baguio City iti uneg ti tallo a bulan ti singasing nga ordinansa ti lokal a konseho a mailaksid wenno saan a mairaman dagiti senior citizen iti implementasyon ti number coding scheme iti Summer Capital of the Philippines.
Daytoy ket kalpasan nga in-veto ni Mayor Benjamin Magalong ti ordinance no. 40 series of 2024 a mangisingsingasing iti pannakailaksid dagiti senior citizen a residente ti siudad, pasahero man wenno driber, nu dagitoy ket agturong iti medical clinic, ospital wenno trabaho.
Sigun kenni Mayor Magalong, ti panang-vetona iti nasao nga ordinansa ket saan a mangipakpakita a kontra daytoy nu di ket kayatna pay a maadal a nalaing ken maammoan ti agbalin a resultana sakbayna a pirmaan.
Nakalanad iti singasing nga ordinansa a tapno mailaksid iti implementasyon ti number coding scheme, masapul a lugan ti senior citizen a residente iti siudad ti naaramat iti transportasyon wenno panagbiahena.
Mangrugi ti traffic experiment inton Agosto 19 tapno maammoan ti agbalin nga epekto daytoy iti gunay ti trapiko nangruna ta nangrugin ti klase.
Mainaig iti daytoy, dinayaw met ni Mayor Magalong ti inisyatibo ti lokal a konseho a mangipaay iti respeto ken insentibo kadagiti senior citizen a residente ti Baguio City.
