BAGUIO CITY- Impeksa ti Department of Trade and Industry a posible a mapasamak ti singasing ni presumptive president Ferdinand Bongbong Marcos Jr, a mapagbalin a P20 agingga P30 ti presyo ti tunggal kilo ti bagas.
Nupay kasta, impetteng ni DTI Undersecretary Ruth Castelo a kasapulan pay ti naing-inget a panagadal seknan iti daytoy.
Dinakamatna nga idi metlaeng 2018 ket inadal ti ahensiya ti presyo ti bagas ken naituding ti presyo daytoy iti P35 tunggal kilo babaen iti inisyatibo ti DTI ken pannakitinnulong ti Department of Agriculture.
Iti kaudian a datus ti Department of Agriculture, agay-ayam ti presyo ti local commercial rice iti P38 agingga P50 tunggal kilo sadiay Metro Manila bayat a magatang ti tunggal kilo ti imported commercial rice ti P37 agingga P52, depende iti klase ti bagas.
