BAGUIO CITY – Naaprubaran iti umuna a panakaibasana iti konseho ti singasing nga ordinansa a panagsingir ti P50 a congestion fee kadagiti amin a bisita a mangitugot iti luganna pastrek iti Baguio City.
Mailaksid ditoy dagiti residente ti Baguio City la ketdi adda ti maiparang da a pamaneknek.
Immunan nga inlawlawag ni Councilor Leandro Yangot Jr., awtor ti nasao nga ordinansa, a babaen iti daytoy ket masolusyonan ti nakaro a parikut iti trapiko iti siyudad.
Nabilin met ti City Treasury Office a mangmonitor ken mang-aramid ti guidelines para iti balligi a panakaiyemplementar daytoy.
Kabayatanna, impetteng ni mayor Benjamin Magalong a nababa unay ti P50 a congestion fee rason nga insingasing na ti panakaipangato pay daytoy.
Inlawlawagna a babaen iti daytoy ket adda ti maurnong a kanayonan a revenue a maaramat iti sumarsaruno a programa ken proyekto iti Baguio City.
