BAGUIO CITY – Impetteng ti dadaulo ti Committee on Public Utilities, Transportation, and Traffic Legislation ti lokal a konseho ti Baguio a kasapulan ti nainget a panakaadal ti singasing a panakanayon ti street parking areas iti nagduduma a kalsada iti siudad.
Iti eksklusibo a panakiyuman ti Bombo Radyo kenni Councilor Benny Bomogao, kinunana a nasken pay a marepaso dagiti imparang a datus ti City Engineering Office (CEO) kas maitunos iti oridnansa a nakailanadan ti klasipikasion ti parking areas iti lokalidad.
Maipalagip a dinakamat ni CEO Engr. Junario Borillo a kurang dagiti 318 slots a nakalukat iti agdama ken dagiti 2,300 slots a masarakan kadagiti establishimento.
Innayonna pay nga apaman a maaramid dagiti kanayonan a parking slots ket maipaayan ti tulong dagiti 50 nga indibidual babaen iti panagserbi dagitoy kas parking attendant.
Kabayatana, mamati ti konsehal a makaipaay-benepisyo iti siudad ti panakai-regulate dagiti agdama a parking areas ti siudad.
Babaen iti daytoy, makaur-or pay iti pondo ti lokal a gobierno babaen kadagiti masingir a babayadan kadagiti motorista.
Binigbigna ti paset ti Lakandula, Magsaysay, Botanical Garden, sango ti The Mansion, sango ti Mines View ken Coyeesan kadagiti maad-adal para iti panakanayon ti regulatory parking ti siudad.
Inaklona pay a maysa a kangrunaan a parikot iti siudad ti maidesignar a pagparadaan dagiti lugan gapu iti limitado nga espasyo malaksid pay a marigatanda a mangisakad iti gakat para iti parking area gapu iti panagtubngar ti publiko ken ti nagduduma a sektor.
