Suksukimatenen iti Sister Cities Executive Committee dagiti singasing iti tallo a local government units (LGUs) a kayatna a mangibangon iti natibker a sisterhood ken twinning relationship iti Baguio City.
Karaman kadagiti nangipila iti resolusion dagiti munisipyu iti Bauko idiay Mountain Province, Lubuagan idiay Kalinga, ken Lumban idiay Laguna.
Sigun iti komite, dumalan pay iti nainget a panagadal, research, ken rekomendasion dagiti nasao a singasing sakbay a maaprobaran daytoy.
Bigbigbigen iti komite ti panggep iti tallo a lokal a gobierno a papigsaen ti relasion ken kooperasion iti Baguio, a nabayag nga agnumnumar kadagiti sister city partnership iti tay-ak iti turismo, nasayaat a panangimanehar, investment, edukasion, kultura, sining ken panangaywan iti aglawlaw.
Nupay kasta, impakaamo iti komite a temporario a saan a maisayangkat ti on-site validation visits gapu iti agdama a national energy emergency ken dagiti addang iti panagtipid iti gobierno, karaman ti pannakasuspindir kadagiti official travel seknan iti sister city engagements.
Kas alternatibo, naisingasing ti panangisayangkat iti validation meeting iti nagbaetan dagiti Local Government Unit ken iti komite iti nagtulagan a petsa.
Nadutukan met ni Senior Tourism Operations Officer Jose Maria Rivera kas focal person para iti nasao a proseso.