Manamnama nga isanod ni Baguio City Councilor Edison Bilog ti insingasingna nga ordinansa seknan iti Gender-Inclusive School Uniform Options kadagiti pagadalan iti siudad ti Baguio, kasaruno ti panagaklonna a nangitunda daytoy iti panaggudua iti opinion iti publiko ken mabalin a makaapektar iti panagkaykaysa iti komunidad.
Sigun kenni Bilog, personalna nga ipila inton Lunes, Hulio 5, ti pormal a withdrawal iti singasing.
Impaganetgetna a numan pay panggep iti singasing a mangipaay iti naan-anay a pagpilyan ken inklusibo a polisia iti uniporme dagiti estudiante, nadagdagsen kano pay dagiti singasing nga agdama a sangsangwen iti sektor iti edukasyon a kasapulan a marisut wenno masungbatan.
Inlawlawag metlaeng iti konsehal a saan laeng a para kadagiti kameng iti LGBTQ+ community ti singasing, nu diket para iti amin iti agad-adal. Iti panangilawlawagna, adda dagiti praktikal nu apay a kasapulan nga ipaayan iti flexible a pagpilyan iti uniporme, karaman ti kinatalged ken komportable a panangikawes iti sidong iti nagduduma a kasasaad.
Maysa kadagiti dinakamatna ti kasasaad iti panagngato iti kaso iti dengue nu sadinno mabalin a makakessay iti exposure ti agdama a kawes iti kumpleto a kawes a kas iti pantalon.
Inayonna pay nga iti panawen iti napigsa nga angin ken tudo, ad-adda a praktikal para iti sumagmamano nga estudiante, nangruna kadagiti babbai, ti mangikawes iti pantalon tapno maliklikan ti disgrasya wenno “discomfort” gapu iti kasasaad iti ruar.
Ti singasing nga ordinansa, a naaprobaran iti umuna a pannakaibasana idi Hunio 22, 2026 ken nairefer iti Committee on Education para iti panagadal, ket panggepna a mangikeddeng iti gender-inclusive ken gender-neutral uniform options kadagiti pagadalan, ken salaknib kontra iti diskriminasion seknan iti panagpili iti uniporme.
Iti baet daytoy, naituding nga isanod iti nagsurat ti singasing bayat nga agtultuloy ti deliberasion iti komite.
