BAGUIO CITY – Imbasura ti lokal a konseho ti siudad ti Baguio ti singasing nga ordinansa a mangkidkiddaw iti panakailaylayon ti operasyon dagiti balay-paginuman ditoy lokalidad.
Sigun kenni Councilor Edgar Avila, daytoy ket gaputa saan a napudno dagiti bar owners iti kiddaw dagitoy a panaka-amyendar ti agdama a Liqour Ordinance gapu iti panangpila dagitoy iti kaso kontra kadagiti sumagmamano a konsehal ti siudad.
Impalawagna a panangallilaw ti inaramid dagiti bar owners kadagiti miembro ti konseho nga immuna a nangputar iti nasao a linteg.
Impettengna a saan a rumbeng nga agbalin a hostage wenno kawtibo ti konseho gaputa napanekneknan met nga ado kadagiti bar owners ti saan latta nga agtultuonog iti ordinansa, partikular ti naituding a panagrikep dagitoy a kas maibasar iti klasipikasion dagiti balay-paginuman.
Gapu iti daytoy, nabilin latta ti Baguio City Police Office iti nainget a panangiyimplementarda iti linteg kontra kadagiti aglablabsing a bar owners.
Maipalagip nga iti singasing nga ordinansa ket maamyendaran ti agdama a Liqour Ordinance ken agbalin nga alas tres iti parbangon ti panagtrikep dagitoy.
