BAGUIO CITY-Imbasura ni Mayor Mauricio Domogan ti Ordinance No. 114, series of 2018 a mangipapaay ti amnestiya kadagiti multa, surcharges, arrears wenno interes kadagiti real taxpayers ditoy siudad ti Baguio a saan a nagbaybayad iti babayadan dagitoy.
Sigun kenkuana, awan umno a rason para iti panakaipaay ti nasao nga amnestiya nangruna ta dakkel ti mapukaw ti lokal a gobyerno kas iti P38.5-M manipud idi napalabas a tawen a panakaimplementar ti amnestiya.
Impettengna a saan a patas a mangipaay ti lokal a gobyerno iti premyo ken insentibo kadagiti tax payers a mapaay a mangbayad iti buis ti real property dagitoy babaen iti panakaipaay ti amnestiya kadagitoy.
Nailanad iti veto message ti mayor a ti gakat a panakaipaay ti amnestiya ket makadadael iti ‘collection system’ ti lokal a gobyerno.
Impalagip pay ti mayor nga addan ti ordinansa a mangipapaay ti 20 percent a diskwento kadagiti real property taxpayers a masapa a mangbayad iti buis dagitoy.
Gapu iti daytoy, kiniddawna ti panangipangruna ti lokal a konseho iti panakapasayaat pay ti panangipaay ti lokal a gobyerno iti insentibo kadagiti agbaybayad ti buis tapnu maguyugoy dagitoy iti regular a panangbayadda iti buisda iti umno a panawen.
