BAGUIO CITY – Imparangen ti CIty Tourism Office ti sistema a maaramat iti panaglukat ti Baguio para kadagiti turista inton sumaruno a bulan ti Setyembre.
Sigun kenni City Tourism Officer Engr. Alec Mapalo, adda ti tallo nga addang tapnu makumpirmar iti rehistrasyon ti maysa a turista sakbay a mapalubusan a sumrek ditoy siudad.
Dinakamatna ti naiyusuat a Baguio V.I.S.I.T.A a maaramat para iti panagparehistro dagiti bisita a sumangbay ditoy siyudad ken ditoy nga ilanad ti turista dagiti amin a kasapulan nga impormasyon kas iti personal information, point of interest, travel histories, date of travel, days of stay ditoy siudad ken travel agent (optional).
Inyunay-unayna met a limitarada laeng iti agingga lima nga aldaw ti kabayag ti panagtalinaed ti turista ditoy siudad ken no kayat dagitoy ti at-atiddog nga aldaw ket masapul nga agparehistro manen dagitoy.
Sumaruno a maala nga impormasyon ti wagas ti panagbayad ti turista ngem awan pay ti naituding a gatad.
Kinunana nga urayenda pay ti desisyon ti lokal a konseho ti siudad iti makolektar tunggal turista para iti lima nga aldaw ken sakupen ti babayadan ti environmental fee, congestion fee ken dadduma pay.
Agingga ita ket awan pay ti naituding nga aldaw a panaglukat ti turismo ti siudad gaputa nasken a mangisayangkat pay dagitoy iti konsultasyon kadagiti dadduma a sektor nangruna iti health sector, bussiness sector ken aminen a maseknan nga ahensya para iti naanayas a panaglukat daytoy.
