BAGUIO CITY- Nabigbig ti siudad ti Baguio kas addaan iti kabassitan a bilang ti drug-free barangays iti intero a rehiyon Cordillera.
Maibasar iti datos manipud iti Philippine Drug Enforcement Agency-Cordillera (PDEA-CAR), uppat laeng a barangay iti siudad ti naideklara kas drug-free bayat a ti probinsya ti Ifugao ti nailista kas addaan iti kaaduan a drug-free barangays a dumanon iti siyam a pulo ket uppat.
Sigun kenni Philippine Drug Enforcement Agency-Cordillera Assistant Regional Director Christy Silva pakabuklan iti 352 a barangays wenno 29.9% manipud kadagiti barangay iti rehiyon Cordillera ti indeklara ti Philippine Drug Enforcement Agency (PDEA) kas drug-free.
Malaksid iti dayta, agarup 797 met a barangays ti naideklara kas drug-cleared; 18 a barangays ti agtaltalinaed a drug-affected; 171 a barangays ti nangmintener iti drug-cleared status, bayat a sangapulo a barangays met ti saan a naapektaran iti iligal a droga.
Nupay kasta, kinuna ni Silva a kasapulan latta a maberipikar dagiti drug-free barangays para ita a tawen bayat a kasapulan a mavalidate dagiti nabatbati a drug-affected barangays.
Kabayatanna, impasiguradona nga agtultuloy latta ti panagregget dagitoy tapno maisardeng ken malapdan dagiti aniaman a kaso nangruna iti iligal a droga.//Rose
