Agpalpallagip dagiti health officials ti Baguio City iti publiko nga agganad dagitoy nangnangruna kadagiti senior citizens, ubbing, masikog, ken persons with comorbidities.
Daytoy ket kalpasan a nakairekord ti siudad ti Baguio iti agarup 125 a kaso ti Covid-19 manipud Enero agingga Agosto 17 iti agdama a tawen.
Sigun kada City Health Services Office (CHSO) Head Celia Brillantes ken City Epidemiology and Surveillance Unit (CESU) Head Donabel Panes, kaaduan kadagiti nasao a kaso ket mild laeng.
Innayon pay dagitoy a kaaduan kadagiti nakaptan iti nasao a virus ken nabakunaan. Mainaig iti dayta, impetteng ni Panes ti kinapateg ti pannakabakuna gapu ta 99% kadagiti agpapaimbag a pasyente ket nabakunaan.
Inwaragawag met dagiti health officials nga awan ti nairekord da nga anyaman a kaso ti Cicada COVID-19 subvariant iti siudad.
Kabayatanna, dumanon metten ti 184 ti nairekord ti Department of Health-Cordillera a kaso ti COVID-19 manipud Enero agingga iti agdama a bulan no sadino 129 ti nailista iti siudad ti Baguio, 39 ti Benguet, 7 ti Mountain Province, uppat manipud Kalinga, sag-2 idiay Apayao ken Ifugao ken maysa iti Abra.
Bayat a mild laeng dagiti kaaduan a nailista iti siudad ti Baguio, mabalballakadan latta ti publiko nga agganad.