Inwaragawag ni Baguio City Mayor Benjamin Magalong a naituding a mangiyemplementar ti siudad ti Baguio iti P250-million sidewalk development project kas paset iti panangpapigsa iti pedestrian safety iti siudad.
Ti nasao a proyekto ket paset metlaeng iti tarigagay ti siudad nga agbalin a walkable urban center.
Sigun kenni Mayor Magalong, nabukel ti nasao a plano ken proyekto babaen iti koordinasyon ti lokal a gobyerno ti siudad kenni Transportation Secretary Vince Dizon no sadinno impettengna a napateg daytoy tapno ma-addressan dagiti hazarous areas iti entiro a siudad no sadino mapilitan ti publiko nangnangruna dagiti estudyante a magna kadagiti nalilipet a paset ti kalsada nga awan ti sidewalks na.
Sigun pay iti mayor, karaman metlaengen kadagiti upgraded a kalsada dagiti sidewalks ken bio-retention drainage systems a nadesinyo tapno mangpapigsa iti groundwater recharge ken stormwater management.
Saklawen ti nasao a proyekto ti sumagmamnao a paset ti siudad kas iti San Luis-Asin Road, Aurora Hill, Trancoville agingga idiay M. Roxas.
Iti baet dayta, binigbig ni Mayor Magalong nga adda dagiti karit a sanguen dagitoy kas iti pole relocation kadagiti maapektaran a paset.
Nupay kasta, impeksana a mannarimaan itan ti pannakikoordinarda iti Benguet Electric Cooperative (Beneco) tapno marelocate dagiti poste nga adda kadagiti pedestrian pathways. //kcs//
