Panggep ti siudad ti Baguio nga agbalin kas “resilient city” inton tawen 2026 nu sadino rumbeng a mapasayaat ti disaster preparedness ken urban development ti siudad kas nakalinya iti international “Making Cities Resilient (MCR) 2030” program.
Gapu iti dayta, nabukel ti technical working group (TWG) babaen ti panangi-isyu ni Baguio City Mayor Benjamin Magalong iti Executive No. 94, series of 2024.
Ti “Making Cities Resilient (MCR) 2026″ technical working group ket idauloan ni Engr. Charles Bryan Carame manipud City Disaster Risk Reduction and Management Office ken Mr. Elias Aoanan manipud City Planning and Development Office kas co-team lider.
Addaan iti lima a kangrunaan a responsibilidad ti technical working group kas iti panangaramid ken panagimplementar iti komprehensibo nga action plan; ti panagmonitor, panag-update ken panag-evaluate iti progreso ti estado ti siudad para iti panggep daytoy a resilient city; ti panakikoordinar kadagiti local, national ken international stakeholders para iti balligi a panakaipatungpal daytoy; ti panangpasigurado a dagiti aktibidad ket inclusive, resilient, gender-responsive, climate change adaptive, ken participatory; ken ti panangisubmitir dagitoy iti report iti opisina ti City Mayor.
Nagpalagip met ni Magalong a nasken a kitaen dagiti technical working group a ti siudad ket saan laeng nga agpokus iti panagbalin a resilient nu diket kitaenda metlaeng a daytoy ket “safe, inclusive, innovative ken sustainable.”
Iti programa a “Making Cities Resilient (MCR) 2030,” daytoy ket nakipasetan dagiti 1,603 a siudad iti intero a lubong bayat nga iti pagilian a Pilipinas, ti Makati City laeng ti nakagun-od iti resiliency status.
