BAGUIO CITY – Nakemmeg ti maysa a SK kagawad ken maysa a negosyante sadiay Aurora Hill, Baguio City gapu iti nagtutuon a kaso, partikular ti panaglabsing iti Article 151 wenno ti Resistance and Disobedience to a Person in Authority, alarm and scandal ken panaglabsing iti liqour ban idi rabii.
Nabigbig dagitoy a da Rene Carion, 22-anyos ken John Alexander Menor, 31-anyos, agpada a residente ti Ambiong Barangay, Baguio City.
Nagserbi met a complainants ket dagiti pulis iti Baguio City Police Office – Station 6.
Maibasar iti report, impaima ti maysa a barangay kagawad dagiti dua iti istasyon ti pulisya gaputa nabartek dagitoy ken nangpartuatda iti riribuk iti East Bayan Park, Aurora Hill a nangitunda iti panakaistorbo dagiti tattao.
Dinamag dagiti pulis no apay a saan a naka-face mask dagiti dua ngem arogante a sinmungbat dagitoy sakbayda a nagpukpukkaw iti sangwanan dagiti pulis kabayatan ti panakadamdamag dagitoy.
Intuloyda a nangpartuat ti riribuk iti baet ti presensia dagiti tattao iti sangwanan ti istasyon ti pulisya.
Nailanad pay iti report nga impukpukkaw ni Carion a daytoy ket SK Chairman ti Ambiong Barangay.
Nagresulta daytoy iti panangikustodiya ti pulisya kadagiti dua ken babaen iti pammilin ni Inquest Prosecutor Margarita Manalo ket naipisok da Carion ken Menor iti Baguio City Jail.
