BAGUIO CITY–Ipakpakita laeng ti gobyerno nga awanen ti planoda para kadagiti agtutubo iti pagilian
Nagbalin a reaksion daytoy ti SK Reform advocate a ni Jayson Balag-ey kasaruno ti addang ti Kamara a panangipasa iti gakat a mangitantan manen iti barangay ken Sangguniang Kabataan (SK) elections iti maikatlo a gundaway.
Iti panakiyuman ti Bombo Radyo kenkuana, kinunana a ti SK ti maysa kadagiti ‘best practices’ ti ‘governance’ iti pagilian, particular iti pakaseknan ti youth leadership.
Impettengna nga adda ti probisyon iti konstitusyon a napateg ti akem dagiti agtutubo iti nation building wenno iti panakapatibker ken panakapadur-as ti pagilian.
Gapu iti daytoy, kinuwestionaran ni Balag-ey no apay a saan daytoy nga inkonsidera dagiti opisyales idi napartak nga inaprobaranda iti Kamara ti sabali manen a gakat a mangitantan iti naituding nga eleksion inton May 14.
Inyunay-unayna pay nga ik-ikkatenda ti karbengan dagiti tattao nga agpili iti kayatda a mangidaulo kadakuada ken impakita metten dagiti agtutubo a kayatda ti reporma ken kayatda a maituloy ti masungad nga eleksion.
