BAGUIO CITY – Dakkel ti tulong a maipaay ti Smart City Command Center ti Baguio iti panakakissay, panakalapped ken panakarisut dagiti krimen a mapaspasamak ditoy lokalidad.
Sigun kenni PCol. Glenn Lonogan, dadaulo ti Baguio City Police Office, in-inot a madalusan ti siudad kadagiti nagduduma a krimen babaen iti nasao a proyekto.
Kinunana a babaen iti daytoy ket dagos a marespondean dagiti nagduduma a krimen ken dagiti pakaseknan dagiti umili ti siudad.
Innayonna a mapapartak metlaeng ti panagresponde ken panangkemmegda kadagiti responsable kadagiti nasao nga insidente.
Sigun pay kenkuana, babaen metlaeng ti nasao a command center ket maipakita ti transparency iti operasyon dagiti pulis ti siudad gaputa makita kadagiti mairekord a video no adda ti panagabuso a maaramid dagiti pulis.
Dinakamatna a mabalin a maaramat nga ebidensia kontra kadakuada dagiti nasao a video footage ken babaen iti daytoy ket maliklikan ti panang-abuso dagiti pulis kadagiti umili.
