BAGUIO CITY – Naiyusuaten ti Smart City Command Center ti Baguio City a temporaryo a masarakan iti iti basement ti Baguio Convention Center idi Sabado.
Aggatad ti proyekto iti P200-M a naponduan babaen iti grant manipud iti gobyerno ti Australia babaen iti Asian Development Bank.
Sigun kenni Mayor Benjamin Magalong, ti command center nga addaan ti state of the art ken moderno a teknolohiya ti epektibo a mangimaton ken mangiwanwan iti nagduduma a parikut ti siudad.
Kinunana a mangipaay pay daytoy iti napimpintas a serbisyo iti publiko, no sadino, mabaelan ti command center a makontrol ti taray ti trapiko, maiwanwan ti kalidad ti angin ken posibilidad ti panaglayos.
Manamnama a naan-anayen ti operasyon daytoy kalpasan ti walo a bulan wenno iti ngudo ti 2021 kagiddan ti panakaiyakarna iti permanente a lokasyon daytoy sadiay Camp John Hay.
Manamnama pay nga iti kanito a makompleto ti command center ket ti Baguio City ti kaunaan a lugar iti pagilian ken iti Southeast Asia nga agaramat iti nasao a sistema.
