Imbutaktak ni Senator Francis “Kiko” Pangilinan nga agtaltalinaed a maysa kadagiti kangrunaan a rason iti nangato a presyo dagiti gagatangen kas iti bagas ket gapu iti agtultuloy nga smugling, importation ken hoarding.
Iti pannakiuman ti Bombo Radyo kenkuana, kinunana a nasken a maadal daytoy a nasayaat nangruna ket awan paylaeng ti naibalud a natiliw nga agar-aramid iti economic sabotage a non-bailable.
Daytoy ket iti baet a maysa a tawenen a naipasa ti linteg nga Anti-Agricultural Economic Sabotage.
Impettengna a saan payen nga agmula iti nasayaat dagiti mannalon gaputa dakkel ti epekto kadakuada dagiti smuggled a nateng ken dadduma pay a produkto manipud China ken kadagiti dadduma a pagilian.
Imbinsa-imbinsana pay dagiti dadduma a rason iti nangato a presyo dagiti gagatangen kas iti saan nga umno a panakaaramat ti pundo, kinukurang iti suporta kadagiti mannalon tapno mapaadu ti local production, ken ti kanayon a panagdependar kadagiti importasyon.
Gapu iti dayta, maangay ti maikatlo a panagdengngeg dagitoy inton lunes no sadino kinunana a paayabanda ti Bureau of Customs tapno dagus a masolusyonan ti nangato a presyo dagiti gagatangen.
Maysa metlaeng a kitkitaenna ket ti panakaamyendar ti Rice Tarrification Law ket ti crop insurance para kadagiti mannalon tapno bumaba ti presyo dagiti gagatangen ken tapno matulungan dagitoy.
Malaksid iti dayta, innayonna pay a paayabanda dagiti consignee kadagiti nadiskubre a mackerel, sibuyas ken dadduma pay tapno sumango dagitoy iti kaskenan a pannusa.
