Naituding a maipatungpal ti snap election sadiay South Korea, innem a pulo nga aldaw ti mapalabas kalpasan ti opisyal a panakaikkat ti takem ni Impeached President Yoon Suk Yeol idi kalman.
Daytoy ket kalpasan nga inwaragawag ti ruling ti constitutional court a saan a constitutional ti panangideklara ni Yoon iti emergency martial law idi Disyembre idi napalabas a tawen.
Iti panakiuman ti Bombo Radyo kenni Ruel Toquero, Bombo International News Correspondent sadiay South Korea, kinunana a unanimous decision ti panakaideklara ni Yoon kas guilty babaen iti 8-0 a botos.
Sigun kenni Toquero, posible a mapasamak ti snap election inton Hunyo a tres iti agdama a tawen.
Gapu iti dayta, agtuloy nga agserbi kas acting president ni Han Duck-soo agingga a a mainagunaran ti baro a presidente.
Iti panakaikkat ni Yoon iti takem, imbinglay ni Toquero a sumaruno a sumango daytoy iti criminal trial gapu ta sabali daytoy iti constitutional court.
Inlawlawag ni Toquero nga iti constitutional court ket maipapan iti panakatingiting no “constitutional” wenno maitunos iti linteg ti naimplementar ni Yoon bayat nga iti criminal trial ket ti panakaiparang dagiti ebidensya.
Innayon ni Toquero a dagiti daduma nga epekto iti panakaikkat ni Yoon ket maikkat met dagiti sumagmamano a prebilihio daytoy ngem agtalinaed a maipaay ti security iti pamilyana.
Naipaayan met ni Yoon iti umno nga aldaw tapno pumanaw iti presidential house.
