BAGUIO CITY | Sisasagana dagiti kameng ti Lesbian,Gay,Bisexual,Trans(LGBT) Community iti Rehion Cordillera a mangsuporta iti maisaksakad a SOGIE Bill iti pagilian.
Iti panakiuman ti Bombo Radyo kenni Van C. Sanchez, founder ken executive director ti Cordillera Pride Community Leaders, manamnama a maaramid ti manifesto dagitoy inton June 15 sadiay Ritz Hotel, Baguio nu sadino, opisyal a mailanad dagiti banag a mangipakita iti panangsuportada iti panagbalin kas linteg ti nasao a gakat.
Sigun kenni Sanchez, mangipatpatungplda kadagiti taripnong wenno session tapno maipeksa dagiti karaman iti nasao a komunidad dagiti pakasekan dagitoy nga adda pakainaiganna iti panangitakderda kadagiti karbengana kas maysa a miembro ti nasao a komunidad.
Pakairamanan dayta ti kaunaan nga LGBT Regional Session a naangay iti Baguio City itay laeng kanikadua a pinasetan dagiti panakabagi ti nasao a komunidad manipod kadagiti nagduduma a lugar iti Rehion Cordillera.
Imbinglay ni Sanchez a babaen iti nasao nga aktibidad ket naipakaammo dagiti maseknan nga indibidwal dagiti an-anek-ekenda, kasta metten a nagbalin a wagas daytoy tapno maisingasing ti panakarebisa dagiti sumagmamano kadagiti nilaon ti SOGIE Bill ken tapno maammoada met ti status daytoy iti Kongreso.
Sigun iti opisyal, nupay agtaltalinaed ti panakatingiting ti nasao a gakat iti Kongreso, patchen ken namnamaenda a maaprubaran daytoy ken agbalin a linteg ita a tawen gapu ta maob-obserbaranda ti in-inut a panang-akseptar ken panangbigbig dagiti daduma pay a Pilipino kadakuada.
Nupay kasta, inaklon ni Sanchez maysa kadagiti karit iti panakaipasa ti nasao a gakat ti nagduduma a panangmatmat dagiti sumagmamano a Pilipino iti daytoy nangruna ti konsepto ti same sex marriage.//Bombo Rob Dominguez
