Maisisingasing ti panakaikarga ti solar powered street light iti likodan ti track oval iti Baguio Athletic Bowl complex.
Kasaruno daytoy ti makidkiddaw iti City Administrator’s Office a panakaikarga dagiti silaw iti nasao a pasilidad tapno maakomodar dagiti indibidual a mangpangpanggep a mangaramat iti daytoy tunggal rabii.
Iti panakiuman ti Bombo Radyo kenni Gaudencio “Gudz” Gonzales, City Sports & Development Officer, nabayagen a kiniddawda ti tower lights para iti nasao a complex gapu ta nagduduman ti working hours ti tunggal maysa, rason a mabalin a rabii wenno aldaw ti panagturongda iti Athletic Bowl.
Innayona a nailatang ti P300-K para iti panakaaramid dagiti transformer ken manarimaan ti negosasyonda iti Benguet Electric Cooperative (BENECO).
Nupay kasta, pakaseknan dagitoy ti naituding a panakarehabilitate ti track oval gapu ta posible a maikkat metlaeng dagiti maimuntar a silaw apaman a mairugi ti nasao a proyekto.
Gapu iti dayta, suhestiyon met ti panakaimuntar ti solar powered street light gapu ta “economic” daytoy ken saan a unay nga agaramat ti kuryente.
Maipalagip a ti singasing a silaw iti Baguio Athletic Bowl complex ket maibasar iti Resolution No. 376, series of 2024 nu sadino makidkiddaw ti panakaaramat ti nasao a pasilidad agingga iti rabii.//Bombo Mera Pacpacan
*muntar-maikabil