BAGUIO CITY – Umap-apela iti kararag ti maysa a soldado para iti dagus a panakarekober ti bangkay ti kabsatna a naibati iti killing zone ti Maute local terror group sadiay Marawi City.
Iti panakiuman ti Bombo Radyo News Team kenni Corporal Romnick Estacio, kinunana nga ur-urayenna ita ti panakarekober ti bangkay ti kabsatna nga scout ranger a ni Jethro Estacio tapnu daytoy a mismo ti mangiyawid iti daytoy sadiay La Union.
Inyistoryana nga idi Sabado ti malem, adda kuma ti ipaima a hostage ti Maute group kadagiti soldado isut gapuna a simrekda iti open area a pagsasabatan kuma dagitoy.
Nupay kasta, tinraydor dagitoy ti terorista a grupo gaputa ti simrekan dagiti soldado ket killing zone dagiti kalaban.
Kinunana a sadiay a pinalpaltogan dagiti kalaban dagiti tropa ti gobyerno a nangitunda iti panakadangran ti sangapulo ket pito a soldado.
Ginandat ti kabsatna nga iguyod ti kadwada a napaltogan ngem natamaan ti ulo daytoy.
Gapu iti kinakaro ti rinnupak ket naibati ti bangkay ti kabsatna ken ti maysa pay a kadwa dagitoy.
Naamuan a rambakan kuma ti kabsatna ti maikaduapulo ket lima a kasangay daytoy inton Disyembre 13.
