BAGUIO CITY – Agtultuloy ti hot pursuit ken clearing operations nga ipatpatungpal dagiti otoridad kalpasan ti rinnupak a napasamak iti nagbaetan dagiti tropa ti gobierno ken dagiti kameng ti New People’s Army (NPA) sadiay Aguid, Sagada, Mt. Province idi kanikadua, September 26.
Sigun kenni PMaj Carol Lacuata, panakangiwat ti Police Regional Office – Cordillera, nagresulta ti rinnupak iti panakatay ti maysa a soldado ken panakadangran ti maysa pay a soldado.
Nabigbig ti pimmusay a ni Cpl. Jordan Manawa manipud Pinukpuk, Kalinga bayat a ti nadangran ket ni Private Melvin Modes nga agpada a kameng ti Philippine Army.
Kinunana a posible a ti naka-engkwentro ti tropa ti gobyerno ket ti grupo ni Marcos Yucogan alyas Ka Timmy a kumander ti Squad Dos West Chico Line ti Kilusang Larangang Guerilla.
Kabayatanna, narekober dagiti soldado dagiti landmines nga inkakali dagiti NPA sadiay Aguid, Sagada, Mt. Province.
Sigun kenni Major Noriel Tayaban, panakangiwat ti 5th Infantry Divsion, Philippine Army, sakbay a napasamak ti engkwentro ket inpulong dagiti umili ti panangikali dagiti rebelde kadagiti landmines kadagiti pagpagnaan dagiti sibilyan.
Kinunana a gapu iti daytoy ket nagresponde ti militar ken idi manarimaan ti clearing operation ket sadiay a pinalpaltogan dagitoy ti agarup 40 a rebelde nga NPA nga addaan operasyon iti Kalinga ken Mt. Province.
Narekober iti nakapasamakan ti engkwentro ti adu a landmines nga inkalkali dagiti rebelde a pammaneknek iti panaglabsing dagitoy iti international humanitarian law gaputa pagpagnaan dagiti sibilyan ti apektado.
