Inkari ni South Korean President Yoon Suk Yeol a labananna ti napolitikaan a masakbayanna kalpasan a na-“impeach” iti maikadua a gundaway babaen ti panagbutos ti parlamento nga indauluan ti oposision gapu iti panangpadasna a mangipakat iti martial law, maysa a tignay a nangkigtot iti pagilian a South Korea.
Naituding a ti Constitutional Court ti agdesision nu maikkat ni Yoon iti sumaruno nga innem a bulan.
Iti kanito a mapatalaw manipod iti opisinana, maisayangkat ti snap election.
Ni Prime Minister Han Duck-soo, a dinutukan ni Yoon ti nagserbi kas acting president, bayat a ni Yoon ket agtaltalinaed iti opisinana ngem nasusupindir paylaeng ti pannakabalinna kas presidente.
Inkari ni Han nga aramidenna ti kabaelanna kalpasan a na-impeach ni Yoon.
Ni Yoon ket ti maikadua a “conservative president” a napapanaw idiay South Korea.
Idi 2017, ni Park Geun-hye ti umuna a naikkat manipod iti puesto kas President ti South Korea.
Maipalagip a nakalasat ni Yoon iti umuna nga impeachment vote idi napalabas a lawas kalpasan a binoykot ti partido daytoy ti panagbotos.
